Илтгэлээс

1981.01.29-нд болсон “МТХ-ийн удирдах ажилтны зөвлөлгөөн” дээр Б.Ринчинпэлжээ дарга “Энэ таван жилд агуулахын талбайг 49.9 хувиар нэмэгдүүлж, агуулахын хангамж 28 хувь байсныг 48 хувьд, агуулахын аж ахуйн механикжуулалтын төвшин 28.6 хувь байсныг 40 хувьд тус тус хүргээд байна. Агуулахын аж ахуйн контор өнгөрсөн хугацаанд 36000 ширхэг төрөл бүрийн ачмаг /поддон/, 7200 нүд бүхий тавиурыг үйлдвэрлэж хангамжийн газруудад нийлүүлж... Өнгөрсөн оны мэдээгээр автомашин ашиглалтын коэффициент 0.6, авто-ачигчийнх 0.55-д хүрээд байна. МТХТШИ-ийн Мэргэжил дээшлүүлэх курсээр нь өнгөрч буй хугацаанд 257 хүнд шинээр мэргэжил олгож, 319 хүний мэргэжлийг дээшлүүлж өглөө” гэжээ.
Д.Моломжамц дарга “1980 онд 1975 онтой харьцуулахад хөдөлмөрийн бүтээмж 40.6 хувиар дээшилж, нэг төгрөгийн борлуулалтанд ноогдох зардал 5.7 хувиар хямдарчээ” гэжээ [ҮТАрхив].

-оОо-

Жамбалын Сэр-Од багш 2007 онд өгсөн “БНМАУ-ын Улс ардын аж ахуйн материал-техникийн хангамжийн системийн тухай товч танилцуулга” сэдэвт эх сурвалжаас 1980-аад оны үеийн дараах мэдээг харьцуулан сонирхуулъя:

“Материал-техникийн хангамж (МТХ)-ийн салбарын байгууллагуудаар 100 шахам мянган нэрийн бүтээгдэхүүн дамжиж байгаагийн дотор 2000 орчмыг нь хороо хуваарилж, бусдыг нь хорооны харъяа МТХ-ийн газрууд хуваарилж байна. Ерөнхий болон ...удирдах газрууд 8600 гаруй үйлдвэр, барилга, соёл, шинжлэх ухааны байгууллага, аж ахуйг яамдын харъяаллыг үл харгалзан шаардлагатай бүх материал, тоног төхөөрөмжөөр хангаж, захиалгыг хэрэглэгчдээс шууд хүлээн авч, бараагаа өөрсдөө хуваарилж байна. ...импортоор авч байгаа үйлдвэрлэл-техникийн зориулалттай бүтээгдэхүүний 80 гаруй хувийг ЗХУ эзэлж байна” гэжээ. Харьцуулбал:
    Гаалийн ерөнхий газрын мэдээгээр 2016 онд хувийн ба зарим төрийн өмчийн оролцоотой, тэрчлэн гадаадын хөрөнгө оруулалттай импортлогч аж ахуйн нэгжүүд 151 оронтой худалдаа хийсэн бөгөөд манай нийт импортын 80.6 хувийг дараах орнуудын гарал үүсэлтэй бараа эзэлжээ. Үүнд БНХАУ 31.0%, ОХУ 26.2%, Япон 9.8%, БНСУ 5.9%, АНУ 4.1%, ХБНГУ 3.6% болно.